ചെവി

ആൾതാമസമില്ലാത്ത
ചാരനിറമുള്ള കെട്ടിടങ്ങൾ പോലെ
വാക്കുകളും രാഗങ്ങളും.
വാക്കുകളിൽ നിന്ന്
അനുഭൂതിയും
രാഗങ്ങളിൽ നിന്ന്
സംഗീതവും
താമസം മാറിയിട്ട്‌
കാലമേറെയായി.

എന്നിട്ടും, പഴയ ശീലങ്ങളിൽ
മുടന്തിനടക്കുന്ന ഒരു
വയസ്സൻ കോൺട്രാക്റ്ററെപ്പോലെ
ഇഷ്ടികകളുടെയും
തറവിസ്തൃതിയുടെയുമെല്ലാം കണക്കുകൾ
മന:പാഠമാണ്‌.

ചാന്ദ്രികം

ഒരു കറുത്ത നക്ഷത്രം,
വെറി പിടിച്ച, പിടിവാശിക്കാരനായ
ഒരു കുട്ടിയെപ്പോലെ
'ഐസ്ക്രീം....
ഐസ്ക്രീം' എന്ന് കരഞ്ഞുകൊണ്ടേയിരിക്കും.
പൊറുതിമുട്ടിയ
തള്ളനക്ഷത്രങ്ങൾ
അപ്പോൾ,
പൊട്ടിപ്പോയ,
വക്കുമാത്രമായി മാറിയ
ആ കപ്പിൽ
ഒരു സ്കൂപ്പ്‌ ഐസ്ക്രീം
വച്ചു കൊടുക്കും.
അത്‌ കാണേണ്ട താമസം,
കുട്ടി അത്‌ നക്കി നുണയാൻ തുടങ്ങും.
കഴിഞ്ഞാൽ പിന്നെയും
കരച്ചിലായി 'ഐസ്ക്രീം...
ഐസ്ക്രീം...' എന്നു പറഞ്ഞ്‌.

സമയം

പൊള്ളുന്ന
ഒരു നിമിഷം
തണലിനായ്‌
വെയിലിനോട്‌
ചോദിച്ചു.

സമയമില്ലെന്ന്
വെയിൽ.

വയലിൻ

എല്ലാ വാദ്യങ്ങളിലും
വെച്ച്‌
വയലിനോടാണെനിക്കിഷ്ടം.

പക്ഷെ
പഠിച്ച രാഗങ്ങൾ
അതിൽ കൃത്യമായി
പ്രയോഗിക്കുന്നത്‌
വെറും
അഭ്യാസം മാത്രം;
സംഗീതമല്ല.

നെഞ്ചോട്‌
ചേർത്തുവെക്കുമ്പോൾ
ചങ്കിൽ നിന്നും
തന്ത്രികളിലേക്ക്‌
സ്വയം
വാർന്നു വീഴുന്നതാണ്‌
സംഗീതം.

അതിനു
വശമില്ലെങ്കിൽ
തച്ചുടച്ചു കളയണം
ആ വയലിനെ.

ഒന്ന്‌, ഒന്നുകൾ മാത്രം

ഇടനാഴിയിൽ,
ഒരു ബെഞ്ചിൽ
ഏഴ്‌,
അഞ്ചിനോടു പറഞ്ഞു:
കുറച്ചങ്ങോട്ടു
നീങ്ങിയിരിക്കൂ;
വല്ലാത്ത ഉഷ്ണം.

അല്ലെങ്കിൽത്തന്നെ
നമ്മളിങ്ങനെ
ചേർന്നിരുന്നാൽ
ആളുകളെന്താണ്‌
വിചാരിക്കുക?
നമ്മളൊരുമിച്ച്‌,
എഴുപത്തഞ്ചെന്നല്ലേ
കരുതൂ?

എന്നിട്ടും,
ഉഷ്ണം ശമിക്കാതെ
ഏഴ്‌.

കുറച്ചു കഴിഞ്ഞപ്പോൾ
ഏഴിലെ,
ഏഴ്‌
ഒന്നുകളും
ഞാനൊന്ന്
നടന്നിട്ടു വരാം
എന്നു പറഞ്ഞ്‌
വീശിക്കൊണ്ട്‌
തലങ്ങും
വിലങ്ങും
നടക്കാൻ തുടങ്ങി.

ഏതാണ്ടിതു
തന്നെയായിരുന്നു
അഞ്ചിന്റെയും
അവസ്ഥ.

ഏഴിലെ ഏഴ്‌
ഒന്നുകളും
അഞ്ചിലെ അഞ്ച്‌
ഒന്നുകളും
പരസ്പരം
ഇടകലര്ർന്നും
പിരിഞ്ഞും
നടന്നു,
തലങ്ങും വിലങ്ങും.

ഉഷ്ണമൊന്ന്
ശമിച്ചപ്പോഴോ,
ആരാണ്‌
ഏഴിലേതെന്നും
ആരാണ്‌
അഞ്ചിലേതെന്നും
തിരിച്ചറിയാതെ
അവർ കുഴങ്ങി.

പിന്നെ,
അവർ
അവിടെനിന്നും
ഇറങ്ങി,
പല വഴിക്കും
പിരിഞ്ഞുപോയി.

D.I.Y

Life
came to me
with a
Do-It–Yourself kit.

I opened
the box.

There are
no instructions.
Nothing.
Nothing at all.

What to do with it?

വട്ടപ്പൂജ്യം

കവിതയെ കവിതകൊണ്ട്‌
ഹരിച്ചാൽ കിട്ടുന്നത്‌
പൂജ്യമെങ്കിൽ,
കവിതയെ കവിതകൊണ്ട്‌
ഗുണിച്ചാൽ കിട്ടുന്നതും
പൂജ്യമെങ്കിൽ
കവിതയുടെ
മൂല്യമെന്തായിരിക്കും?